Þá er ég bara orðinn 5 mánaða gamall!

Svo fór ég í skoðun á föstudaginn og er loksins farinn að þyngjast almennilega og var hún Sigurósk hjúkrunarfræðingur voðalega ánægð með mig og mamma og pabbi auðvitað voðalega stollt af mér. En núna mælist ég 7765 grömm og 66,5 cm langur - og auðvitað voðalega flottur :-) Ekki að spyrja að því.

Ég fékk líka aðra sprautu og stóð mig eins og hetja, tók ekki einu sinni eftir því þegar ég var stunginn. Mörgæsin sem ég fékk að skoða var miklu meira spennandi heldur en þessi sprauta.

Svo í gærkvöld ákváðu mömmurnar að hittast án okkar krílanna og hafa bara mömmu partý. Samkvæmt mömmu var voðalega gaman og leið tíminn alltof hratt. En mér skilst að þær ætli nú að fara að hittast meira án okkar, end þær hafa nú svosem alveg gott af því að komast út annaðslagið og slappa af og njóta sín.

Þetta bara gengur ekki hjá okkur mömmu lengur!!! Við verðum að taka okkur betur á með bloggið.

Við erum voðalega dugleg því við erum líka farin að labba um helgar með Elís Mána og Heiðu mömmu hans - eru einmitt sætar labbimyndir af okkur í albúminu mínu. En mamma og Heiða eru víst eitthvað að velta því fyrir sér að stækka hringinn og labba bara lengra! Okkur Elís Mána er svo sem alveg sama með það, enda eru þær orðnar svo fljótar með hringinn að það er bara betra fyrir okkur því að þá fáum við að vera lengur úti.

Ég ákvað að dagurinn í dag væri hentugur til að fara að rúlla mér af bakinu og yfir á maga. Og var það bara svona ægilega gaman að ég ákvað að skella mér bara aftur yfir á bakið!! Dundaði ég mér við þetta í um 30 mínútur og máttu ekkert vera að því að fá mér hádegismat.

Pabbi fór til París í morgun en hann ætlar sem betur fer að reyna að koma heim sem fyrst. Halló pabbi!

Það var víst komið af hittingnum hjá okkur núna í febrúar og var voðalega gaman hjá okkur. Erum við nú orðin ekkert smá stór og flott lítil kríli.

Ég var nú svolítið úldinn því að ég hafði ekki sofið áður en ég fór í hittinginn og var með smá læti en náði svo að sofna í smá stund. Við vorum orðin vel spræk og farin að hreyfa okkur tiltölulega mikið svo það var nokkuð um veltinga hingað og þangað.

Annars er mamma búin að setja inn myndir bæði úr hittingnum og frá janúar og febrúar.

Hann Martin frændi er að fara til Íraks á morgun á vegum danska hersins og vil ég, ásamt mömmu og pabba, óska honum góðrar ferðar þangað niður eftir. En vonandi verða þessir 6 mánuðir sem hann á að vera þar fljótir að líða.

Svo voru mamma og pabbi að fá fréttir um það að ég sé að fá lítinn frænda ... eða við höldum að þetta sé lítill frændi ... en hún Stine konan hans Martins á að eiga í byrjun október og erum við ógurlega spennt fyrir því. Það verður gaman að fá lítinn frænda. Svo eru þau að öllum líkindum að fara til Grænlands í nokkra mánuði og ætlum við að reyna að heimsækja þau þangað. Og verður gaman að hitta Martin frænda og Stine frænku ásamt litla frænda og að fá að sjá Grænland í bónus.

Góðan daginn allir, það er víst kominn tími til að uppfæra síðuna mína. Við mamma höfum ekki staðið okkur nógu vel í því þessa dagana!

Það er sko meira en nóg bú að vera að gerast hérna, Ási langafi og Ásta langamma komu frá Akureyri og hitti ég þau í fyrsta skipti, það var voðalega gaman. Því miður gátu þau ekki stoppað lengi því þau voru að fara til Keflavíkur og ég var að fara í sundtíma. En síðan þá er ég búinn að hitta þau nokkru sinnum og auðvitað voru teknar myndir af mér með þeim. Þau vara nú heim til sín í dag svo að það verður einhver tími áður en ég hitti þau aftur, en vonandi ekki of langur.

Hann pabbi minn skrapp svo í vinnuferð til Parísar og kom heim á fimmtudaginn, ég saknaði hans alveg ógurlega en var svo þreyttur þegar við mamma fórum að sækja hann á fimmtudaginn að ég gat bara ekki heilsað honum - það varð bara að bíða betri tíma.

Ég er búinn að vera nokkuð fjörugur á næturnar undanfarið, og hef verðið að vakna klukkan 2, 4 og svo farið bara á fætur klukkan 6:15 hvort sem aðrir eru tilbúnir til þess eða ekki. Hef ég helst bara viljað spjalla og hafa gaman en mamma og pabbi eru víst ekki á þeim buxunum að leifa mér að spjalla bara við sig á næturnar!!
Það finnst mér voðalega skrítið!!!!
En mamma og pabbi vonast til þess að ég fari nú að fara aftur í mitt gamla mynstur og sofi frá 9 - 7:30, við verðum bara að bíða og sjá hvort að ég geri það eða ekki.

Svo er ég að fara að eignast nýjan vin eða vinkonu í ár. En það er ennþá leyndarmál svo það kemur bara í ljós hvenær og hvar seinna meir. En ég er annars voðalega spenntur.

Og svo flottustu fréttirnar eru þær að í gær fundust tvær tennur í neðri gómi hjá mér. Var nefnilega voðalega skrítið að það var bara algjör slefdettifoss hjá mér en svo allt í einu var eins og það væri skrúfað fyrir krana og hef ég varla þurft slefsmekk síðan þá! Þær eru  nú ekki komnar langt enn sem komið er enn það finnst fyrir þeim og glittir í hvítt í gómnum mínum.
Mamma og pabbi eru auðvitað alveg að springa úr stolti yfir þessum nýja áfanga mínum.

Vildi bara óska Jenný frænku til hamingju með afmælið á þriðjudaginn og Mumma frænda með sitt afmæli í dag.

Knúsikveðja, Sebastían